رسالة اعتذار ..

سايب لك قبل مامشى .. رسالة اعتذار ..
عشان ماقدرش أجيلك ..
فى مره واشتكى لك ..
لإن الشكوى عندك .. مالهاش أى إعتبار ..!!

عيونك الف مره .. قالت لى مستحيل ..
أسمح لك بالمغادره .. والهجره والرحيل ..
وحاولوا يبعدونى .. عن حلمى ويحرمونى ..
من احساسى النبيل ..
وانا .. ماقدرش اجيلك .. فى مرة واشتكى لك ..
لإن الشكوى عندك .. مالهاش أى إعتبار ..!!

حاسافر ألف ليله .. وليله وألف يوم ..
وبرضه ياحبيبتى .. الحال مش راح يدوم ..
مسافر .. مش عشانك ..
عشان اسبق زمانك .. عشان انسى الهموم ..
وانا .. ما اقدرش اجيلك .. فى مره واشتكى لك ..
لان الشكوى عندك ..
مالهاش أى اعتبار ..

حسافر والمسافر .. ماشى بيحلم بإيه ..؟
بيحلم يلقى حلمه .. حقيقه بين ايديه ..
وحلمى الخوف على .. ويوم ماتحسى بيا ..
ح اجيلك قلب تانى .. عنده استعداد يعانى ..
عشانك ليل نهار ..
سايب لك قبل ما امشى ..
رسالة اعتذار .


من غير وداع ..

عن وعى واقتناع ..
سبتك من غير وداع ..
وان كنتى مكدبانى ..
أو ليكى رأى تانى ..
مالكيش حق الدفاع ..

رجوعى عن قرارى ..
دا شىء صعب وبعيد ..
لإنه بإختيارى .. ودا الحل الوحيد ..
لانك غير عاديه .. فى العند والأسيه ..
وانا بطبعى عنيد ..

لو جيتى تقدمى لى .. الطاعه والولاء ..
عندى استعداد أقولك .. ساعتها الف لا ..
وانا ما اقبلش إنى ..
ابقى لك غصب عنى ..
ودى كل المشكله ..

عايزانى .. أبقى ليكى .. لايمكن ده يكون ..
لانك قاسيه جدا .. وانا بطبعى حنون ..
ورفضى ليكى نابع ..
من ألف ألف دافع ..
ودا عقل مش جنون ..




الرحيل ..

معقول أحبك ..
فى الزمان المستحيل .. !!
معقول أجيلك ..
والنهار ف عيونى ليلى ..!!
غصب عنى ..
الزمان منى سرقنى ..
والبديل .. هو الرحيل ..

ياللى قلبك ..
قلب فيه أحلى المعانى ..
كان منايا .. أوهبك عمرى وزمانى ..
إنما الأيام خدتنى ..
وف بحورها دوبتنى ..
واما ضاع الحلم منى ..
الأمانى عذبتنى ..
غصب عنى .. الزمان منى سرقنى ..
والبديل .. هو الرحيل ..

انتظارى ..
فرصه تانيه .. شىء بعيد ..
والرحيل .. فى الوقت دا .. الحل الوحيد ..
وإن زمانى .. ضحك لى تانى ..
وابتديت أعرف مكانى ..
حتلاقينى بين إيديكى ..
واكتبك .. غنوة زمانى ..
بس انا .. دلوقتى ناوى ع الرحيل ..
الرحيل ..


العالم بيكى اتحداه ..

لو صوتى سمعتى نداه ..
وفهمتى ايه معناه ..
حاوهب لك عمرى بحاله ..
والعالم بيكى اتحداه ..

الحب صحيح بالقلب ..
لكن لو عقل معاه ..
عمره مايقابل صعب ..
ولا عمره يحس بآه ..
واختارك قلبى ولكن ..
عقلى له رأى معاه ..
وان كنتى فهمتى ياروحى ..
قصدى وعرفتى مداه ..
حاوهب لك عمرى بحاله ..
والعالم بيكى اتحداه ..

ممكن نعشق ونغنى ..
للحب بدون تفكير ..
ونشوف بعض ونتشوق ..
ونطير زى العصافير ..
بس الواقع ياحياتى ..
اكبر من كده بكتير ..
وان كنتى فهمتى ياعمرى ..
رأيى وعرفتى مداه ..
ح اوهبلك عمره بحاله ..
والعالم بيكى اتحداه ..!!


جبل الجليد ..

كل مره ..
توعدينى .. وتخلففى مليون ميعاد ..
واما اقابلك ..
تسبقينى .. توصفينى بالعناد ..
والغريبه .. ان قلبى ..
عاش لحبك ..
وانتى قلبك .. من جماد ..

حبى ليكى .. حب فوق الحب ذاته ..
حب حقق م البدايه .. أمنياته ..
واما اقولك .. عيشى أجمل معجزاته ..
تضحكيلى .. وتقوليلى ..
فوق سنين الحلم فاتوا ..
وان عاتبتك تسبقينى ..
توصفينى بالعناد ..
والغريبه .. ان قلبى عاش لحبك ..
وانتى قلبك .. من جماد ..

قلت لك .. نمشى ايد ماسكه ف ايد ..
قلت لك .. يمكن الأشواق تزيد ..
انما كنتى معايا ..
كتلة من صخر وجليد ..
وانتظرت كتير لقيتك ..
قلب ف شعوره عنيد ..
مستحيل أفضل أحبك ..
وانتى قلبك .. من جماد ..

خطر ..

خط .. خطر ..
حبك .. خطر ..
قربك .. خطر ..
بعدك .. خطر ..
طلعتنى فوق السحاب ..
نزلتنى .. ويا المطر ..
حبك خطر ..

إنسان غريب ..
أمرك عجيب ..
طبعك دا غير بكل البشر ..
ساعات مخيف ..
ساعات لطيف ..
ولا حبى على بالك خطر ..
حبك .. خطر

لو قلت لك .. إشتقت لك ..
بتقول ولا عندك خبر ..
وابعد بعيد .. شوقك يزيد ..
وتقول لى ليه .. ولا ليك أثر ..
حبك خطر ..

صدق اللى قال .. الناس بحال ..
وبألف حال .. حبك ظهر ..
طبعه الخلاف .. خلانى اخاف ..
منك ومن حكم القدر ..
حبك خطر ..

فوق السحاب ..

فوق السحاب .. وحدى وانا .. ماليش صحاب ..
غير النجوم .. أما القمر .. عن عينى غاب ..
وسألت ليه غاب القمر ..؟
قالولى تعبان م السهر ..
وارتاح ونام .. فوق السحاب ..

ح استنى يوم .. أو بعض يوم .. يمكن يقوم يصحى ..
يحضن قلوب .. ساعة الغروب . محتاجه للفرحه ..
لكن أخاف .. آخر المطاف ..
يبعت لنا .. ويقول لنا .. ظروفى مش سامحه ..
وانا عايز أنام ..
فوق السحاب ..

نزل المطر .. غطى الشوارع والشجر ..
والنور بدا .. واهن ضعيف ..
والليل مخيف .. من غير قمر .. الليل مخيف ..
وسألت ساعتها النجوم .. إيه الخبر ..؟
قالولى دى دموع القمر .. زعلان على حال البشر ..
وارتاح ونام ..
فوق السحاب ..

بان القمر .. سألته ايه سبب الغياب ..؟
قال لى لقيت .. حال البشر .. عجب العجاب ..!!
والخوف بيملا قلبهم .. والحلم داب ..
واتمنى أشوف الكون سعيد ..
والناس يحبوا من جديد ..
وافضل معاهم للأبد .. رغم السحاب ..
فوق السحاب .

أكون أو ى أكون ..

أكون أولا أكون .. الصمت والسكون ..
لايمكن أرضى بيهم .. وانا ليا وجود وكون ..

قيمة مشوار حياتى .. فى سهرى ومعاناتى ..
والليل مهما يطول .. مسير الفجر آتى ..
واللى ف بالى يكون ..

لو هبت ريح عفيه .. يزيد العزم فيا ..
واقابلها بتحدى .. وبارادتى القويه ..
اكون فوق الظنون ..

ماليش فى الدنيا إلا .. إرادتى المستقله ..
ولايمكن يوم أسلم .. للأفكار الممله ..
فى الحركه والسكون ..

جوايا قلب رافض .. اليأس إنه عارض ..
واعشق موت التحدى .. ومواجهة اللى فارض ..
الخوف يملآ العيون ..

أكون إنسان مثالى .. ونجمى يبقى عالى ..
دا حلم العمر كله .. هلد تاجابكوعشانه لاأبالى ..
مهما المشوار يكون ..